عيد ميلاد ماريان


الزوجة الـ PHENOMENA أم تلات عيال!

انا ماشوفتش مخلوق كده! عمري ما شوفت حد ممكن يحب حد كده، عمري ما شوفت عطاء بالكم كده، عمري ما شوفت تفاني كده (تفاني يعني بتفني وبتخلّص على نفسها)… عن ماريان ماعنديش كلام كتير يوصف مشاعر لأن دي حاجة خاصة ولانها ماتتوصفش، لكن يمكن لمحة من مواقف آخر فترة تعكس اطنان حقايق بعيشها انا وعيلتي كل لحظة…

– ماريان اللي خلال السبع شهور الأولى من حمل كانت بتصحيني وتنزل تعملي الفطار وتجهز الغدا الساعة ٥ الصبح، وبالخناق بطلت واكتفت انها تعمل الغدا من اليوم اللي قبله على مضض وهي فعلا متضايقة وحاسة انها مقصرة في حقي!!! (أخلاق)
– ماريان! ماريان اللي في آخر شهر في حملها شالتني شيل بسبب إصابة رجلي! ولما كنت بحمّل على رجلي أو بتشوفها بتسوء كانت بتقفش عليا… (إحساس)
– ماريان! اللي فضلت تروح الشغل لغاية ما كان فاضل لها اسبوع واحد على الولادة وكنا عاملين حسابنا نفصل لنا يومين لكن ماعرفناش من الظروف والحاجات اللي ورانا (أولويات)
– ماريان اللي بعد ما اخدت اجازة الولادة رجعت اشتغلت من البيت كام ساعة في ال weekend علشان في حاجة مسكاها ومش عايزة الشغل يتأثر بغيابها! (مسؤولية)
– ماريان اللي فضلت تودي وتجيب وتسوق وتخلص مشاوير ودكاترة وعلاج طبيعي وتخزين طلبات البيت قبل الولادة… (حكمة)
– ماريان اللي قعدت تدفع فواتير وتحويلات وحسابات online علشان مافيش حاجة تقع منها أثناء فترة الولادة! (تخطيط)
– ماريان! اللي اخدتني علشان نجيب هدايا للعيال قبل ما تولد بـ ٤٨ ساعة… (تفاصيل)
– ماريان اللي نزلت تجيب زينة لحجرة المستشفى علشان لما نور تتولد وكانت بتودي وتجيب العيال قبل ما تولد بـ ٢٤ ساعة (الجمال)
– ماريان اللي راحت تجيب هدية لمناسبة مش هاتلحق تحضرها عشان الولاده قبل ساعات من العملية! (الواجب)
– ماريان اللي رتبت وجهزت وفكرت في كل التفاصيل لدرجة إنها قالت لي هات snacks علشان أثناء ما إحنا في الولادة الناس تتسللى!!! (الغير)
– ماريان ووضبت البيت ورتبت كل التفاصيل ولفت هدايا العيال وفكرت معايا هالبس إيه ووضبت شنطة المستشفى، وقعدت تزيّن الـ chocolate basket ليلة الولادة! (المُبالغة)
– ماريان اللي وضبت شنطة العيال علشان يباتوا عند اختي واحنا في المستشفى! (التركيز)
– ماريان اللي كانت مصممة تروح المستشفى سايقة، وبالخناق والسباق ركبت جانبي! (الهبل)
– ماريان اللي في وسط القيصرية وبطنها مفتوحة بتقول لي أنا كويسة! (الجوز)
– ماريان اللي لما شافت نور تفاعلت تفاعل رهيب وفضلت شايلة البنت أثناء العملية علشان الـ baby bonding (الأم)
– ماريان اللي كل ما حد يدخل ويقولي مال رجلك تفضل تقول قد إيه انا محمل على نفسي وأن ماعنديش خيارات وببقى انا اللي صعبان عليها!!! (العبط)
– ماريان اللي كل ما اساعدها في حاجة بيبقى الامتنان والشعور بأنها مش مصدقة نفسها هاياكلها!! (الخنقة)
– ماريان اللي قفشت عليا لما عرفت اني بجيب لها هدية!! (الهري)
– ماريان اللي اكتشفت إنها باعتة رسالة لاختي علشان تجيب بالونات للبنت وبتقول لها “ممكن علشان لو انا رحت هاتطلّق؟”!!! (كان هايحصل)
– ماريان اللي وهي مش قادرة تقف على رجلها مش عايزاني ازقها على الكرسي المتحرك علشان ماتعبش!!! (الرفق)
– ماريان اللي في وسط فحتة القيصرية لتالت مرة ومرار النوم والقاعدة صعبان عليها علشان بنام على سرير مش مريح جانبها في المستشفى! (البطاطس)

وبعد كل ده ماريان اللي فقدت ٢٥٪ من دمها في الولادة بتسابق الزمن علشان تقف على رجليها وتعمل احسن حاجة للبنت ولعيالها وجوزها!!! (ماريان)

أكيد كلمات الحب والشكر والتقدير والعرفان هاتكون ركيكة… فكل سنة وانت ماريان