عارف

عارف…
عارف لما تبقى مش مستحمل العيشة ومش فارق معاك حاجة ومش طايق نفسك؟
طب عارف لما تبقى عارف كل الحلول وعارف كل الحِكم وحافظ كل المواعظ؟
عارف لما تبقى مش مستحمل تسمع من أي حد اي حاجة لأنك عارف كل الكلام اللي هايتقال؟
طب عارف لما تبقى عارف بس مش عايز؟ يعني حتى الصح اللي انت عارفه مش عايزه!
عارف لما تبقى عايش في الواقع وكانك بتتفرج على مسرحية هزلية سخيفة ومش عايز تشارك فيها لكن كمان مجبر تتفرج؟
طب عارف لما ترجع لورا وتتفرج على الرسمة اللي انت كنت منهمك في تفاصيلها وتلاقيها مالهاش معنى؟
طب عارف لما تكون قاعد مهنّج ومش عارف تعمل حاجة ومجرد مستني اخرتها اللي هي مالاكش ايد فيها؟
عارف بقى لما تبقى قاعد في وسط ناس وتلاقي نفسك ساكت لأنهم بيهروا في كلام فاضي؟ وتكتشف إن نفس القعدات دي انت كنت جزء أساسي فيها؟
طب عارف الاحساس انك ماعندكش مانع تعمل اي حاجة ومش فارق معاك اي مبداء أو قناعة عندك وكانك فكيت ايدك من كل الرُبط؟
عارف الاحساس انك عايش في عالم موازي لان الواقع بقى يفرض عليك سخافته وانت رافض منطقه؟
طب عارف لما تكون واثق في ربنا بس مش عايز تقرّب منه لأنك ماباقيتش فاهم، فبتسحب نفسك على ما هو يخلص شغله؟
عارف بقى لما تبقى مبادئك وقِيٙمٙك بقيت تقيلة عليك؟
طب عارف لما يكون جواك كلام خايف تقوله لأنه نابع من أفكار مش لاقي لها مهرب؟
عارف لما يكون عندك ثوابت وخبرات سابقة راسخة جواك وعارف انها الصح لكن ملّيتها ومش مستحمل تشتغل بيها وعليها تاني؟
طب عارف لما بتتفرج على دورة الحياة وتلاقي عمرك بيجري والزمن بيعدي وانت مش راضي ولا عن الماضي ولا الحاضر؟ عارف لما المستقبل بيبقى عبارة عن انك مستني النهاية علشان دي الحقيقة الثابتة؟
عارف لما تبقى تعبان قوي ومش قادر تقف على رجليك لكن تِتعب نفسك اكتر لأنك مش عايز تقابلها (نفسك)؟
عارف لما تجرب ألف حاجة الف مرة وبالف طريقة وفي الآخر تلاقي نفسك واقف مكانك؟
طب عارف لما بتلاقي نفسك بتحاول تتقمص شخصيتك اللي الحواليك عارفنها عنك علشان الدنيا تمشي؟
عارف لما بتدور في كل حاجة حواليك انك تطلع منها حاجة مختلفة أو استخدام جديد من كتر رفضك للمعتاد والطبيعي والمتداول؟
عارف لما كل اللي حواليك أو حتى الناس اللي في الشارع يكونوا مبهورين بيك وانك قد إيه مبدع وخُزعبلي وفي الآخر انت في عين نفسك ماتساويش تلاتة تعريفة والكلام ده مش مكيّفك؟
طب عارف لما بتتعرض لمواقف والناس مستنية منك كلام او رد أو موقف وانت جواك حاسس انك اسطوانة مشروخة؟
طب عارف لما تبقى حاسس رغم كل وأي إنجاز إن الحياة لسة مابتديتش وان فرصتك واحسن استخدام لامكانياتك لسه ماجاش؟ طب عارف لما تبتدي تفقد الأمل ان ده يحصل من أساسه؟

يمكن اكون قلت حاجة جواك مش عارف تعبر عنها ويمكن عندك اسئلة تاني ويمكن عندك ردود، أنا بقى ماعنديش رد على ولا سؤال وعندي اسئلة عشر أضعاف، مش عايز مواعظ، لو وصلت لحاجة هاقول…

عارف انا كتبت الكلام ده ليه؟ علشان ماباحبش ابان بصورة هولاكو ولا سوپر مان، كتبت علشان ابقى حقيقي… وبكره هاتلاقيني نازل عليك بخبر كله حياة وطاقة ومعنى وقيمة… هو ده انا وهو ده الإنسان…