آه.. آه من لهفة حب صادقة

آه.. آه من لهفة حب صادقة في عيون ولد، ونظرة بنت ناطقة شوق وخجل تهز بلد.. آه من نظرة بتحضن من سكات أو ضحكة تدوب قلوب وتحكي حكايات.. آه من طاقة وقوة حب بتفتح طاقات أمل لمستقبل بيبتدي وماضي بيتتوج في ليلة بتشرق فرحتها على العمر بطوله.. آه من بنت بتغمض عنيها لأنها مش مصدقة اللي شايفاه ومش عارفة ايه تقوله؟!.. وآه من عفوية المشاعر والفرحة لما بتحرك اتنين كانوا قاعدين على نفس الدكة من الحضانة والنهارده بيتجوزوا.. آه من اتنين يقولولك صورنا هنا عند البلاطة دي علشان هنا افترقنا والنهارده بنتجمع تاني وللأبد.. اه من رهبة ولد بيرفع الطرحة من على وش بنت بتنط من عنيها الفرحة! شوف أب بيحضن جوز بنته وعنيه بتقوله “يابني على عيني وانا سايبها دي بنتي، أبوس ايدك خليها في عنيك… دي حتة مني!” آه من عيون بنت بتسمع “في الصحة والمرض في الفقر والغنى حتى يُفرّق بيننا الأجل” أو ولد عنيه في عنين حبيبته وهي بتقول له “زوجتُكِ نفسي” آه من ليلة فرْح في عيون أهل واصحاب ومزيكا وفَرَح، ورتم طبلة ورِق وقلب بيرِق نبضه بين اتنين الحب جواهم طَرح! شوف ولد بيغني والفرحة بتحشر صوته. اسمع صوت مزيكة بتهز المكان وكلمات أغاني بتحكي قصة مافيش منها تاني!

مش بس كده.. آه كمان من رقصة حب هادية ودموع فرحة نادية بتملا عيون أب! واه من أم بتبص على ابنها وعنيها مستخسرة ترمش وهي بتقول بقيت راجل بقيت شب! آه من بسمة راسمة فرح على خدود أم بتبص لبنتها في المراية والطرحة بتكمّل الفرحة وبتقول الحكاية! آه من لهفة وشوق لأم أتمنت نظرها يكون أحسن بس علشان تشوف بنتها أوضح يوم فرحها. شوف أخت بتستخبى تعيط علشان أختها مش هاتبات معاها من النهارده! آه من دمعة بنت اتمنت أمها تشوفها في فستانها الأبيض وماحصلش! أو أم أتمنت جوزها يبقى أبو العروسة بس الأب غايب، واخ بيسلم اخته لعريسها وكله نشوة وقوة بس من جواه بيقول لأبوه انت أولى باللحظة دي بس اللي خلف ماماتش!

ياااه ياما الأفراح ما فرحتني وياما بكيت! مهما قلت ومهما حكيت! كل اتنين وراهم قصة بتبني البيت! عرفتوا ليه بحبها؟ علشان فيها صدق وحب، فيها مشاعر وضحك ودموع، ايوه فيها ناس جديدة كل ليلة، لكن كمان فيها بداية جديدة من قصة عنيدة، قصة نجحت وبتتوج في ليلة، ولمة اصحاب وعيلة! وانا واحد شاف كل أنواع البشر مطلوب منه يحس ويفهم ويشوف ويفرح ويبكي ويقرا ويكتب لحظات للأبد. أنا مش حاجة كبيرة ولا حاجة، كل اللي في أيدي مستطيل وشوية ألوان ونور وظل ومنظور والباقي شوية مشاعر وعنين عمالة تلف وتدور. بس في الآخر بسيب حاجة أطول من عمري، حاجة تفضل شاهدة على وعد وحب وعهد.